Psa 135 | TVK | STEP | Mupet rat his Iahova, xamim xa mube moletin te polien nan.

Psalms 135

Kikeien te Memesien

1 Mupet rat his Iahova,
xamim xa mube moletin te polien nan.
2 Xamim xa di musoh e Nim na Iahova, xa mudi sangas visali,
mupet rat hisen.
3 Mupet rat his Iahova vengan xa xi bos pupu.
Murum ni hisen vengan xa esaeen nan eilep.
4 Rakila en vengan xa Iahova tehosei Siakop tehe nan xati,
e moletin xil tahal Isrel latehe nan tevi.
5 Nakila xa Iahova be eilep,
xi mili hi sav xil.
6 E ut nesao e ut etan,
Iahova di pol ni holesok xil vus xa xi kestang ien bei.
E tas e pe huitan,
xi pol vuol ni nenemien nan.
7 Xi misa momah xil xa nggo hoxalite xil te ut etan.
Xi pol ni an bilahil e melele te an tesa, e milihi rat votiang ra von nen.

8 E Isip, xi tehas vin muimol xil vus,
na moletin xil, e na vongoro xil mun.
9 E rute ak, xi tepol ni merekel xil e holesok xil xa tellep.
Xi tesa pangasien mi suv toto tahal Isip, e mi vat nan xil.
10 Xi temu lel moletin te kantri sav xil holu,
e tehas vin suv toto xil xa latehur xeihen.
11 Xi tepol ni temak mi Sihon xa tehe suv toto tahal Amor,
mi Og xa tehe suv toto tahal Basan,
e mi suv toto xil vus xa lateti e tan xil tahal Kenan.
12 Tan xa teleh rerati ra he xil,
tesa ni mi moletin xil nan tahal Isrel tengan ihe nae.

13 Iahova, moletin xil ti linem xat hisen vehakut.
Holesok xil vus xa tepol ni, iexil nabong ni ti ven.
14 Iexil nabong ni Iahova ti vengan ihur xol moletin nan xil,
esaeen nan iti mi moletin te polien nan xil.
15 Moletin xil te ut xil ngasen, lapol ni hi nae xil ni silva e gol;
xil di lapol ni xil nggo he xil tang.
16 Hi nae xil,
valonge di, e lasakras lasepin ni;
mete di, e lasakras lapus neta ni.
17 Vurange di, e lasakras lalongeong ni;
xil lasakras lasehseh.
18 Ngan xil xa di lapol ni hi xil ak, e ngan xil xa laneket e xil,
bos xa xil limei lixoni nanao nae xil tang.

19 Mupet rat his Iahova, moletin xil tahal Isrel,
pris xil na Hi, mupet rat hisen.
20 Mupet rat his Iahova, xamim Livaet xil,
xamim vus xa di mumerere ni, mupet rat hisen.
21 Xami xa mudi Hu Saeon, mupet rat his Iahova,
vengan xa xi di e Serusalem.

!Mak, ma bos xa mupet rat his Iahova!